विराटनगर । आज विराटनगर– ५ स्थित एभरेष्ट स्कुलमा दिउँसो निर्क घुईचो लागेको थियो । जहाँ आफ्ना छोराछोरीको क्षमता हेर्दै अभिभावकहरु मख्ख देखिन्थे ।

छोराछोरीले निर्माण गरेका विज्ञानका आविस्कारको प्रदर्शनी, आफ्ना आविस्कारका विषयमा उनीहरुले राखेको प्रस्तुतीले अभिभावकहरुलाई निकै लोभ्याएको थियो । यस्तै विभिन्न खेलकुद सम्बन्धि आविस्कारमा अभिभावकहरु समेत मनोरञ्जन लिइरहेको थिए । विद्यालय परिसर भित्र विभिन्न ८३ वटा आयोजना विद्यार्थीले निर्माण गरि आज अभिभावक र शिक्षकका माझमा प्रदर्शनी गरेका हुन् । विद्यालयका कक्षा ६ र ७ का ४५० विद्यार्थी प्रदर्शनीमा सहभागि बने ।

प्रत्येक ५ जनाको एक समूह बनाई विभिन्न विषयका ८३ वटा प्रोजेक्टको प्रदर्शनी भएको हो । आफ्ना छोरीहरुको प्रदर्शनी हेर्न पगेका अभिभावक अमित कुशवाहले यस्तो प्रदर्शनीले विद्यार्थीलाई निकै हौसला प्रदान गर्ने बताए । दुई दिन राती अबेरसम्म बसेर छोरीले निर्माण गरेको आविस्कार हेरेको उनले यसले भविष्यमा धेरै सघाउ पुग्ने विश्वास ब्यक्त गरे ।

प्रदर्शनीमा सहभागि विद्यार्थीहरु समेत निकै हौसिएका थिए । आफ्नो समूहको प्रदर्शन अरुको भन्दा अब्बल बनाउने प्रतिष्पर्धामा देखिएका विद्यार्थीहरुले यसले धेरै कुरा व्यवहारिक रुपमा सिक्न सहयोग पुगेको बताए । कषा ६ की शिक्षा बस्नेतले कक्षामा सिकेका कुरालाई व्यवहारमा उतार्न सहयोग पुगेको बताइन् । यस्तै अर्की विद्यार्थी श्रेया बरालले यस्तो प्रदर्शनीले थप उत्साह प्रदान गरेको बताइन् ।

विद्यालयका भाईस प्रिन्सिपल टीएन भण्डारीले व्यवहारिक शिक्षामा जोड दिँदै आएको एभरेष्टले यस्ता गतिविधि निरन्तर गर्दै जाने बताए । उनले प्रदर्शनी गर्ने तय भएसँगै हरेक विद्यार्थीले उत्साहपूर्ण सहभागिता जनाएको भन्दै बालबालिको क्षमता हेरेर अभिभावकहरु समेत उत्साही भएको बताए ।

विद्यालयका प्रिन्सिपल टिकाराम पुरीले विज्ञानका कुराहरुलाई व्यवहारिक रुपमा उतार्न यस्ता प्रदर्शनीले सहयोग पुग्ने बताउनुभयो । उनले कारखानासँगको सहकार्यमा वैज्ञानिक उत्पादनको आधार बनाउँदै लगिने समेत बताए ।

यस समाचार खबर पुर्वान्चल अनलाइन पत्रिका वाट लिएको हाे ।